مين عمر الشال

أنا أسمي عمر عبدالواحد محمد الشال ، ناشط سياسي زي ما بيقولوا :) يساري يميني أو يميني يساري ... شاب زي شباب كتير مصريين بيحبوا بلدهم وبيعشقوها وعرفوا هم بيحبواها قد ايه بعد ثورة 25 يناير.
ربنا أكرمني إني أشارك في الثورة من يوم 25 يناير بس مش من أول اليوم - من بعد العصر تقريبا لما قدر أكسر حاجز الرهبة جوايا وعرفت يعني إيه أكون مصري.
مش عارف ليه الناس دايما بتبص على الناشطين السياسيين على إنهم إما شباب صغير أو ناس مش لاقيه شغل أو مرتاحة مادياً ... وكأن مينفعش يكون فيه حد بيشتغل في السياسية وبيشتغل وناجح في شغله العادي !!
أنا أشتغلت في حاجات كتيير وأنا صغير بس من كتر حبي للكمبيوتر تدرجت في وظايف كتيرة داخل وخارج مصر لحد ما بقيت مدير تنفيذي في شركة خدمات انترنت اسمها مسك MESC.
بحب القراءة والكتابة بس مبحبش الكلام الكتير ... علشان كده بكتب قصص قصيرة ومقالات قصيرة - كتب مقالات رياضية كتيرة اتنشرت على موقع الأهلي - لأني أهلاوي وبحب الأهلي - وكنت بكتب حاجات سياسية بس مش كتيرة وبعد الثورة بقت كل إهتماماتي تقريبا هي مصر والسياسية واتنشرت لي بعض مقالات في موقع جريدة الشروق ومصراوي ومواقع تانية.
أنا كمان مدير المكتب التنفيذي لحزب التغيير والتنمية المصري ووكيل مؤسسين واتشرف بكده وشايف ان لازم قطاع كبير من المصريين لازم يشتغلوا في السياسة علشان بلدنا مضعش مننا تاني.
مش عايز أصدعك بكلام كتير بس لو حبيت الخص عمر الشال في كلمتين هقول ... مصري وبس.